Conservative candidate zawng zawngin Brexit Deal an thlawp: UK PM
British prime minister Boris Johnson chuan Conservative election candidate zawng zawngin Brexit Deal an thlawp thu a sawi.
December 12-a ram inthlanpui an hmachhawn turah Conservative candidate-te chuan Brexit deal thlawp turin thu an tiam vek tih sawiin, Sunday Telegraph-in an kawmnaah an party candidate 635-te chuan House of Common-a Brexit Withdrawal Agreement thlawp vek turin ziakin thu an tiam tih a sawi.
" Conservative-in majority an neihna sorkar kan nei thei a nih chuan, Brexit kan tih hlawhtling thei dawn a, tihkhawtlai emaw sawisel emaw a awm thei lo ang," a ti. Inthlanah an chak a nih chuan January thla chhung ngeiin European Union (EU) aṭanga Britain lakchhuah a tum dawn tih a sawi bawk.
Savanta ComRes-in opinion poll a siam hnuhnung berah chuan Conservative-ten sorkarna an siam leh ring 41% an awm a, sorkarna an siam leh ringtu an tam ber. Labour party-in sorkarna an siam ringtu chu 33% an awm thung.
Vawiin hian Boris Johnson leh Labour party leader Jeremy Corbyn chu an election campaign kaihhnawihah TV-ah debate nei tur an ni a, boruak a san hle rin a ni.