Iran 'lethal force' hman White House-in a dem

Tuialhthei man san vanga Iran-a duh lohna lantirtute laka sorkarin 'lethal force' (thih theih hial khawpa tharum thawhna) a hmang chu White House chuan a dem thu a sawi.

Iran security force-te'n 'lethal force' an hmannaah hian mi pahnih an thi tawh a ni. White House press secretary Stephanie Grisham chuan US-in Iran mipuite chu an thlawp tih sawiin, 'lethal force' hman leh inbiakpawhna kawnga khuahkhirhna an siam chu na taka an dem thu a sawi.

Zirtawpni khan tuialhthei man tihsan a nih thu hi Iran sorkar hian a puang a, hemi hnu lawk hian buaina chhuak zuiin, mi tam takin duh lohna an lantir zui a ni. Nikum May thlaa US president Donald Trump-a'n Iran a hrek aṭang khan Iran economy hi a tlahniam hle nia sawi a ni bawk. 

2015 nuclear agreement aṭanga US a inhnuhdawh aṭang khan US hian Iran hi a hrek zui a ni. Duh lohna lantir a nih tuk lawk aṭang hian Internet service-ah khuah­khirhna siam zui a ni a,  Kermanhshah khawpuiah chuan Inrinni khan police leh duh lohna lantirtute innek buainaah police pakhat kahhlum a ni bawk.

Mi eng emaw zatin hliam an tuar tawh a, police-te hian mi tam tak man tawh bawkin, duh lohna lantirtute hian kawngpuite an dan bakah vantlang bungruate an hal a ni. Sirjan-ah tharum thawhna hi a hluar zualin, acting governor Moha­mmad Mahmoudabadi chuan tualchhung mi pakhat a thih phah tawh bakah fuel station-te pawh beih a nih thu a sawi.