Pakistan social media rules thar sut leh turin ngen

Asia Internet Coalition (AIC) chuan Pakistan sorkar hnena social media rules thar a siam chu sut leh turin a ngen a, he dan thar a siam hi hman a nih chuan company-te tan Pakistan-a hnathawh a har dawn a, ram economy thlengin a tuar phah thei dawn niin an sawi. 

Pakistan Tehreek-e-Insaaf sorkar hian kar liam taa social media rules siam tharin, an ram chhunga digital company leh social media platform hrang hrangte chu he dan thar hmang tur hian thla thum hun a pe a ni. 

Dan siam thar hnuaiah hian social media company-te chu data leh information kimchangte investigation agency-in a dil a nih chuan a pe zel tur tih a ni. Agency hnena pe duh lote chu Rs maktaduai 500 thleng chawitir theih an ni ang.

Mahse he dan thar hi AIC chuan a duh lo hle. Asia Inter­net Coalition hi internet leh technology company hrang hrang - Facebook, Twitter, Google, Amazon, AirBnb, Apple, Booking.com, Expedia Group, Grab, LinkedIn, LINE, Rakuten, leh Yahoo-te telna a ni. AIC managing director Jeff Paine chuan he dan thar hi an duh loh thu Pakistan prime minister Imran Khan leh senior official-te hnenah ziakin a hrilh a, Pakistan sorkar chuan a dan thar hi ngaih­tuah ṭha leh a, sut leh tura an duh thu a hrilh nghal a ni.