West Bank-a cheng Israel-te Dan ang thlapa awmah US-in pawm
United States chuan Palestine ram Israel-in a luah, West Bank-a cheng Juda mite chu international law hnuaia dan anga awmah a pawm tawh thu a tarlang.
US Secretary of State Mike Pompeo chuan West Bank chungchang chu Israel leh Palestine-te chinfel tur a nih thu a sawi a, "Dan hnuai pawl lehlam lehlam debate-nate ngun taka zirchian a nih hnuah, United States chuan Israel tualchhung mi West Bank-a awmte chu international law kalha awmah a pawm lo a ni," tiin a sawi.
Israel chu US thutluknaah hian an lawm hle a, Israel prime minister Benjamin Netanyahu chuan US-in a ngaihdan a thlak chuan "history-a thil dik lo a tidik" niin a sawi a, ramdang pawh US anga thutlukna siam ve turin a sawm.
Barack Obama hunlai kha chuan West Bank-a Juda mi awmte hi dan lo anga awmah US pawh hian a ngai ṭhin a, tunah erawh a ngaihdan a thlak ta a ni.
Buaina tam chhan West Bank
1967 Middle East war hma kha chuan West Bank hi Palestine ram ang veka ngaih a ni ṭhin, mahse indo hnuah khan Israel hian West Bank ram hi a la luah chhunzawm thung. Helai hmun vang hian Israel leh Palestina inkarah buaina a chhuak nasa tawh hle bawk.
Juda mi 6,00,000 vel zet chu West Bank leh East Jerusalem-ah an cheng a, khawvel ram dangte chuan international law kalha khawsaah henglaia Juda mi chengte hi an puh a, heihi Israel erawh chuan a hnial nasa hle a ni.
Palestine chuan an rama Israel awmte hi an chhuah theih nan nasa takin hma a la tawh a, Palestine ram puitling an sualchhuah huna an hmun pawimawh tur a nih thu pawh an sawi fo a ni.
Palestine negotiator-in eng nge a sawi?
Chief Palestinian negotiator Saeb Erekat chuan US thutlukna chu khawvel ralmuanna leh venhimna kalpuina kawngah 'risk' a ni tih sawiin, international law chu 'ramhnuai dan' hmanga thlak tumah US chu a puh a ni.
US leh West Bank
1978 khan Jimmy Carter thuneihna hnuaiah West Bank-a awmte hi international law kalha awmah pawm an ni a, mahse 1981 khan President Ronald Reagan chuan heihi a pawm loh thu sawiin, dan lo anga awm an nih loh thu a sawi ve thung.
Hemi hnu hian US chuan dan lo anga awm ni lo, dan zul chiah ni lo (illegitimate)-a awm angah pawm zuiin Israel hi UN-ah a hum chhunzawm a ni. Mahse Barack Obama hunlai khan US tihdan phung hi thlak niin, UN laka a hum
ṭhin a titawp a ni.
Tunah erawh Donald Trump kaihhruaina hnuaiah US hian a hum chhunzawm leh tawh dawn niin a lang a, sawiseltu erawh an tam leh hle ngei ang.