Firfiakten Mali sipai 24 that

Mali khawchhak lama inbeihna thlengah firfiakten Mali sipai 24 an that a, sipaite hian firfiak 17 an that ve bawk tih an sawi.

Mali leh Niger sipai ṭangkawpte chuan Thawhṭanni khan Gao border region-ah beihpui thlakin, hetah hian firfiakte nen hian an inkap a ni. Sipai 24 an thih bakah hian midang 29 an hliam bawk a, Niger-a Tiloa-ah chuan rinhleh thilah mi 100 an man bawk.

Thuneitu lam chuan Thawhṭannia inbeihna thleng hi chiang takin an la puangzar lo thung a, firfiakte hi eng pawl nge an nih tih pawh tarlan a la ni lo bawk. Hetihlai hian Mali sipai-te chuan an Twitter-ah mortorcycle eng emaw zat kang lai thlalak an tweet a, 70 vel zet chu an chhiat thu an tarlang tel a ni.

Mali-ah hian 2012 aṭang khan Islamist helte vangin tharum thawhna a hluar hle a, security force-te chuan theihtawp chhuah mah se a khat tawkin inbeihna hi a la thleng reng. Tunhnai lawk pawh khan firfiakte chuan sipai 54 an lo that tawh bawk.

UN chuan Mali leh Burkina Faso-ah chuan kumin chhungin tharum thawhna thlengah tualchhung mi 1,500 vel an thi tawh tih an tarlang a, mi maktaduai chuang chhawmdawl ngai an awm tih an tarlang bawk a ni. Tunah hian Mali bikah hian UN peacekeeping force 1,500 vel an awm mek.