Hong Kong Polytechnic campus chhungah Nawrh huaihawt 100 chuang la awm

Hong Kong Poly­technic university campus chhunga nawrh huaihawtten ni eng emaw zat an inkulh hnuah, Thawhṭanni zing khan police-te chuan an hnawrdarh a, hetichung hian nimin thleng khan campus chhungah mi 100 chuang an la awm.

Nawrh huaihawt mi 600 bawr velin he campus hi an chhuahsan tawh a, heng zinga mi 400 chu kum 18 chung lam an ni bawk. Campus chhuahsan tawh zinga an mi mante hi thubuai siamsak an nih theih bakah kum 10 thleng lungin tang tura tih theih a nih thu chief executive Carrie Lam chuan a sawi. 

Campus chhunga lungawilote hi zirlai an ni a, pawn lam aṭangin an ṭawiawm bawk a ni. Nawrh huaihawt a nih chhan hi Hong Kong inrelbawlnaa China a inrawlh nasat avang leh, an ramah democracy tundin a nih theih nan a ni.

Hetih lai hian China sorkar chuan Hong Kong court-in nawrh huaihawtte hmai tuamna hman a khap chu a dem thu a sawi chhuak ve bawk. 

Kumin June thla aṭang khan Hong Kong sorkar laka lungawilote hian nawrh an huaihawt ṭan a, police-te tun tlenga an mi man tawhte hi mi 4,491 an ni. Tunkar Pathianni hian local council inthlanna neih tura ruahmanna kalpui mek a ni a, mahse buaina a awm avang hian sawn hlat emaw inthlanna neih rih loh a nih maitheih thu Hong Kong secretary for constitutional affairs Patrick Nip chuan a sawi.