Israel-ah inthlan neih ṭhat a ngai leh mai thei

Israel prime minister Benjamin Netanyahu leh Blue and White party hruaitu Benny Gantz-te chuan ṭangrual sorkar siam turin inremna an la siam thei lo a, hei vang hian Israel hian kumin chhunga a vawi thumna turin inthlanpui an neih leh a ngai maithei. 

Netanyahu leh Gantz-te hian Parliament seat 120-a sorkar turin member an ngah tawk lo ve ve a, ṭangrual sorkar an siam a ngai a ni. Netanyahu hian an party, Likud Party hmingin ṭangrual sorkar an siam thei lo tih a tichiang tawh a, hemi hnu hian President Reuven Rivlin chuan Gantz hi hun a pe ve leh a ni. Nizan zanlai khan Gantz-a hnena sorkar siam tura hun pek hi a zo dawn a, nimin tlai thlengin sorkar siam thei tura mamawh member a la nei thei lo. 

Thawhlehni zan khan Netanyahu leh Gantz hian meeting nei mah se inremna siam loin meeting hi an titawp a ni. Meeting hi Jerusalem-a PM office ah an nei a ni. Hruaitu pahnihte hian President Rivlin-an party pahnihte chu  thuneihna insem a, PM dinhmun pawh inchelh chhawk tura a rawtna chu an pawm thei lo ve ve a ni. 

Gantz hian hun pek chhunga sorkar a siam thei lo a nih chuan, Parliament member-te chuan sorkar siam tur hian member pakhat an thlang chhuak leh thei dawn a, ani pawh hi ni 21 hun pek a ni ve leh ang. Hun pek chhunga sorkar a siam thei lo a nih chuan inthlan buatsaih ṭhat leh a ngai dawn a ni.