UK consulate worker-in China-ah sawisak a nih thu a sawi

UK-in Hong Kong-a consulate an dah ṭhin, Simon Cheng chuan China-ah ni 15 chhung hren a nih thu leh a sawisak a nih thu BBC a hrilh. Simon Cheng hi Hong Kong mi a ni a, UK sorkar tan hian kum hnih dawn thawk tawhin August thla khan China-ah hian man a ni. A hmai tuam sakin nasa takin an sawisa tih a sawi. UK sorkar chuan Cheng-a thusawi hi rintlakah a ngai bawk.

Cheng chuan Hong Kong nawrh huaihawt chung­changah information a zawng tih sawiin, British Fo­reign Secretary Dominic Raab chuan Cheng-a chunga China chet dan chu an dem tih sawiin, China thuneitute chu thil awmdan thlir leta mawhphurtu zawngchhuak tura an phut thu a sawi.

A sawisatu chuan secret service tana thawk an nih thu leh mihring dikna chanvo a awm loh thu a sawi hnu lawk­ah a sawisa zui nghal niin Cheng chuan a sawi a ni. Cheng hi UK consulate-a rade and investment officer a ni a, China-ah hian a zin fo a ngai ṭhin. June thlaa Hong Kong-a buaina a chhuah khan infor­mation lakhawm tur hian a inpe a, mahse China chuan UK buainaah hian Hong Kong chu inrawlhah a ngai nia sawi a ni. 

Man a nih chhan hi a hriat bik loh thu a sawi a, UK consu­late a nih vang emaw, China-a Hong Kong nawrh thlawptu ṭhian a neih vang emaw a nih a rin thu a sawi thung.