Sweden-in WikiLeaks founder thubuai titawp

Sweden prosecutor chuan WikiLeaks foun­der Julian Assange, hmei­chhia pawngsuala puhna thubuai chu kum 10 dawn hnuah a tihtawp sak. 

Pawngsual thubuai siamsak a nih vang hian Julian Assange hi Lon­don-a tlanchhiain, Ecua­dor embassy-ah hun rei tak a awm phah a ni. Kum 2010 khan Assange hi pawngsuala puhna thubuai hi siamsak a ni. Prosecutor-in titawp mah se appeal theih a la ni. Pawngsuala puhtu ukil chuan an appeal dawn leh dawn loh an ngaihtuah mek tih a  sawi. 

Thubuai siamsak a nih hnuah Assang hian Sweden-a a thubuai hma­chhawn tura thawn a nih tur pumpelh nan, kum 2012 khan London-a Ecuador embassy-ah  inhumhimna dilin a cheng zui a ni. Kumin April thla khan embassy aṭang hian police-ten an hruaichhuak lui a, jail-ah dah mek a ni. WikiLeaks hmanga US thuruk pawi­mawh eng emaw zat a puanzar sak avangin US chuan a chungthu ngaihtuah turin an rama lak theih dan a buaipui mek bawk. 

Kum 48 mi, Australia mi Assange hian pawng­suala an puhna hi thu dik lo a nih thu sawiin, amah tihchhiat tumna niin a puh.