Russia-in Covid-19 vaccine pe chhuak ṭan
Russia chuan Inrinni liam ta aṭang khan an rama Covid-19 vaccine siam, Sputnik V vaccine chu clinic 70 aṭangin mipuite a pechhuak ṭan.
Covid-19 vaccine hi hri dona kawnga hmatawngtu, hri kai hlauhawmawm zual medical worker, zirtirtu leh social worker-te hnenah pek hmasak a ni dawn. Vaccine pek dan tur hi UK-in a pawm tak, Oxford-AstraZeneca vaccine siam nen a inang a, ni 21 danah ṭum hnih injection pek a ngai dawn a ni.
Russia chuan a vaccine sem tur hi an dawn duh leh duh loh chu mipuite duhthlanna a ni tih a sawi. Mahse pek chhuah a nih aṭanga darkar nga chhungin vaccine dawng duh mi 5,000 velin an hming an ziak hman a ni.
Vaccine pek turte hi minute 10 chhung an hriselna dinhmun enfiah sak phawt niin, hemi hnu hian minute 15 chhung chu an vaccine dawn tur hi buatsaih a ni. Vaccine hi -18C ah dah reng a ngai a ni. Official-te chuan vaccine dawngte hian pek anih aṭanga darkar 42 hnuah an immunity an tihchak a ngai tih a sawi. Vaccine hi dawng thei tur hi kum 60 hnuai lamah bithliah a ni a, natna benvawn nei, thawhah leh naupai laite chu pek an ni lo ang.
Russia hian Covid-19 vaccine hi pahnih a siam a, SputnikV hi Russian Direct Investment Fund in a thlawp a, Vector Institute-in vaccine hi a siam ve bawk.
Scientist-te chuan Russia vaccine siam hman tura pawm a ni hma leh, mipui hman tura an semchhuak hi ala hlauhthawnawm niin an sawi a, mahse Russia lam chuan enchhina an neih aṭangin a rintlak tawk niin a sawi ve thung.