Argentina-in mi hausate Covid-19 chhiah a pek tir dawn

Argentina Senate chuan Covid-19 dona kawnga mamawh, damdawi leina leh sum lama harsatna tawkte sorkarin a chhawmdawlna kawnga pui turin an rama mi hausa, millionaire-te hnen aṭangin chhiah a la dawn.

 

Kar liam ta Zirtawpni khan 'millionaire tax' lakna tur hi pass a ni a, he chhiah chawi tur mi hausa hi 12,000 vel an awm a ni. 

President Alberto Fernandez chuan he ruahmanna hian Covid-19  hri leng vanga hun rei tak inkharkhip a ngaih avanga sum lama harsatna tawkte chhawmdawlna tura sorkar hmalaknaah a puih ngei a rin thu a sawi. 

Senator Carlos Caserio chuan he ruahmanna hi thil danglam tak, ṭum khat chauh sorkar puihna tura mi hausate pawisa thawhtir a nihna tur a ni tiin, indona paltlang hrep ram ang maiin he hripui leng hian mi tam tak thihna thlenin sum lamah harsatna nasa tak a thlen a ni, a ti. 

Chhiah lakna tur duan hian US dollar maktaduai 2.45 nei chin a huam a ni. Hemi aṭanga sum hmuh hi damdawi leh damdawi hmanrua leina atan te, sumdawng tenaute chhawmdawlna atan te, zirlai rethei zawkte puihna atan leh natural gas project puihna atan te hman a ni ang. 

Argentina ramah hian Covid-19 hmuh chhuah hi mi maktaduai 1.45 an tling tawh a, hripui thihpui hi 39,500 chuang an awm tawh bawk.