Israel-ah sorkar thar la ding thei lo
Israel prime minister Benjamin Netanyahu-an ṭangrual sorkar a siam theih loh hnuah sorkar siam tura sawm, Blue and White Party hotu Benny Gantz pawhin hun pek chhungin sorkar thar a siam thei ta bik lo.
September 17-a inthlanpui an neih hnuah tun thlengin Israel-ah hian sorkar thar a la ding thei lo a ni. President Reuven Rivlin chuan Benny Gantz hi sorkar siam tura a sawm hnuah, Nilaini zan zanlai thleng khan hun a pe a ni. Gantz hian ṭangrual sorkar siam turin PM Netanyahu hi inbiakna neihpui mah se, inremna an siam thei lo a, ni 28 hun pek chhungin sorkar siam tura mamawh, member 61 thlawpna a nei thei ta lo a ni.
Sipai hotu hlui, Gantz chuan nimin khan President Rivlin hnenah sorkar a siam theih loh thu hi hrilhin, theihtawp chhuah mah se a kaihhruai sorkar a din theih lohna turin ṭhenkhatin an lo bei ve reng niin a sawi. Gantz hian
ṭangrual sorkar siam puiah Netanyahu hi sawmin, ṭum eng emaw zat inbiakna pawh an nei hman. Chanpual inzata insem chungchangah inrem mah se, prime minister dinhmun chelh turah an inrem thei lo.
Party lian pahnihten sorkar an siam theih tak loh vangin Parliament member-ten an thlanchhuah, member pakhat chu sorkar siam tur hian sawm leh theih a ni ang. A ni pawh hi a hmaa mite ang bawkin ni 28 hun pek a ni leh dawn a, hemi chhung hian Parliament seat 120 awmnaah sorkar siam turin member 61 thlawpna a zawng ve leh dawn a ni. Mahse hun tiam chhunga sorkar a siam thei lo a nih chuan,inthlan neih ṭhat leh a ngai ang. Inthlanpui neih a ngai dawn a nih chuan nakkum kumtir lamah buatsaih a ni dawn a, hei hi thla 12 chhunga inthlanpui buatsaih ṭum thumna a ni dawn a ni.
April thla khan inthlanpui hi neih a lo ni tawh a, mahse hemi ṭum pawh hian sorkar siam thei an awm lo. Hei vang hian September 17 khan inthlanpui vawi hnihna an nei leh a ni. Yisrael Beitenu party hruaitu leh defence minister hlui Avigdor Leiberman chuan Gantz leh Netanyahu chuan ram hmangaihna aiin an mimal duhdan an dah pawimawh avangin sorkar an siam thei lo niin a puh. Inthlan hmachhawn leh an ngai dawn anih chuan ram hruaitu ṭha an neih loh vang a ni ang, tiin a sawi.