Australia-ah ramkang vangin zirna in khar

Tun thla tir lam aṭanga  Australia khawchhak lama ram kang chuan ziaawm lam a la pan thei lo a, kangmei laka mipuite him zawk nan Australia thuneitute chuan Nilaini khan chhimlama zirnain 100 chuang an khar tir. 

Zirnain 100 chuang khar a nih bakah hian kangmei in a kankai mai theih bula awmte chu inral­ring tura hriattir an ni bawk. Australia ram­kangah hian mi paliin nunna an chan tawh thu tarlan a ni. Ram hectare maktaduai 1 chuang a kan chhiat bakah, ramkang hian chenna in 300 chuang a tihchhiat thu tarlan a ni bawk.

Australia ramkang hi khawchhak lam aṭang chhimlamah a kangkai a, thuneitute chuan thli na tak a tleh tel avangin kang ṭhelh a har phah thu a sawi. Nipui laia ram kang hi Australia ramah chuan a thleng fo a, Australia chhim lam hian kum thum chhung khawkheng an tuar tawh a ni. December aṭanga February thla hi Australia ramin nipui a hman hun chhung a ni a, hei vang hian Australia ram hian khaw lum lam a pan ve zel a ni. Khua a ro vang te, thli lum tleh vangte leh tui tlem vangin ram kang hian ziaawm lam a pan hlei thei lo niin thuneitu lam chuan an sawi.