Donald Trump-a'n inthlahna thuchah a sawi
US President chhuak ta Donald Trump chuan President a nihna anga a thuchah hnuhnung a sawi ta a, Thawhlehni khan a thuchah hnuhnung sawi hi video kaltlanga tihchhuah a ni.
Donald Trump chuan an tih tur ang an tih bakah thildang tam tak an tih thu sawiin, a chhungte leh a thawhpuite bakah America mipuite hnenah lawmthu a sawi. President anga a hun hman tawp dawn kar hnih chhung chu an ram a buai zual hle a, Thawhlehni khan a thuchah hnuhnung hi sawiin indona hautak tak a hmachhawn a, inbeihna harsa ber a bei tih leh chu chu amah an thlan tlin chhan pawh a nih ngei thu a sawi bawk.
"Politics hmanga tharum thawhna thleng hi American kan nihna anga kan ngaihhlut zawng zawng beihna a ni. En liam mai theih a ni lo," a ti. A thuneihna hnuaiah chuan khawvel chanchina economy ṭha ber an siam tih sawiin,"Kan agenda kha right emaw left emaw lam a ni lo a, Republican emaw Democrat lam emaw pawh a ni hek lo, ram tana ṭha tur lam zawk a ni a, chu chuan ram pum a kawk," tiin a sawi bawk.
Trump-a inthlahna thuchah sawi hi record lawk a ni a, minute 20 tling lo deuh niin YouTube lamah pawh dah chhuah a ni a, a thuneihna hnuaiah chuan an tih tur dik tak an tih thu a sawi a ni. Donald Trump-a hmalakna hrang hrang hi a ṭhat leh ṭhat loh chungchangah inhnialna a tam thei hle ang. Ramria km 640 laia thui indaidana bang a siam te, tax tihtlem chungchang te, trade war leh middle east-a inremna a siam dan chungchangte bakah Jerusalem Israel khawpuia a puan chungchang thlengin inhnialna a tam thei hle ang.
US chanchina President impeach vawi hnih hmachhawn awmchhun a ni a, a chanchin hian hun lo la awm zel turah pawh sawizui a hlawh hle ang tih a rin thiam theih. US President-elect Joe Biden leh a deputy Kamala Harris-te chu an ram huna niminah khan US President 46-na leh Vice-President ni tura lakluh an ni. Kamala Harris hi America-in Vice-President hmeichhia a neih hmasak ber a nih dawn bakah, black leh south Asian thisen kai VP an neih hmasak ber a ni bawk.
Zahngaihna lantir list-ah amah leh a chhungte an tel lo
Donald Trump hian a hun tawp dawnah hian zahngaihna a lantir tur list a tichhuak a, hetah hian hming 73 langin chung zingah chuan White House ex-aide Steve Bannon pawh a tel.
Hetihlai hian list-ah hian a hming emaw, a chhungte hming emaw lang a awm lo a, a lawyer Rudy Giuliani hming pawh a lang lo. Rapper Lil Wayne leh Kodak Black bakah Detroit Mayor hlui Kwame Kilpatrick-te pawh zahngaihna a lantir list-ah hian an tel a ni.