Jack Ma vantlang hmaah a inlan leh tawh

Asian pa hausa Jack Ma chu thla eng awm zat vantlang hmaah a inlan loh hnuah nimin khan a rawn inlan leh ta a, China-a thingtlang zirtirtu 100 hmaah video kaltlangin thu a sawi a ni.

China rama en­trepreneur hlawhtling Jack Ma hian nimin khan kumtina buatsaih ṭhin rural educator-te chawikanna tur programme-ah live­stream-in a inlan a, he hunah hian Ma hian midang ṭanpuina atan a hun tam zawk a hman dawn thu a sawi.

Alibaba founder hian Beijing nena an inkar chungchang engmah a sawi lo a, Jack Ma thusawi chungchang tarlangtu tualchhung thuthar theh­darhtu Tianmu News chuan a charity foundation peng pakhat a­tan zirtirtute hmaah hian thu a sawi tih an tarlang a, hei hi provincial Zhejiang sorkar pawhin an nem nghet tawh.

Rural educator-te chawikanna programme hi kumtinin Sanya-ah neih ṭhin a ni a, kuminah erawh Covid-19 hrileng vangin online-in an nei a ni. Jack Ma hian hri len vangin Sanya-ah kan inhmu thei lo a, hri a len loh hunah erawh Sanya-a kan inhmuh ngei theihna turin hun kan zawng dawn a ni, a ti.

Hetihlai hian Ma hian khawi aṭangin nge thu a sawi tih erawh tarlan a ni lo. A company Alibaba hian Hong Kong stock exchange 5% vel lai chu a pha a ni. Jack Ma company Ant Group Co. leh Alibaba Group Holding Ltd-te hi China sorkar chuan a chhui chiang mek a, hetihlai hian thla hnih chhung vel chu Ma hi vantlang hmaah a inlan tawh loh avangin mi tam tak ngaih a ṭha lo a ni. Tunhnaiah phei kha chuan a bo niin thu a thang nasa hman hle a, ṭhenkhat chuan China sorkarin a man ta niah te an ngai hman hial.