Kum 22 chhunga Japan tlawhtu tlem ber kum

Kum 2020 kha hripui leng vangin Japan sorkar chuan hun rei tak ramri te kharin,  ram dang mi luh a khap a, hei vang hian kum 22 chhunga ram dang mi  khualzin tlawhtu an neih tlem ber kum a ni. 

Japan National Tourism Organisation data tihchhuah tharah, kum 2020 chhungin ram dang mi khualzin an neih chu 84.2% in a tlahniam a, tourism leh business thila ram dang mi tlawhtu an neih hi maktaduai 4.1 chauh a ni. Kum 2019 khan tlawhtu hi maktaduai 31.9 zet an awm a ni. 

Kum 2020 kha Japan-in Olympic leh Paralympic Games a thlen kum tur a ni a, hei vang hian kum dang ai pawha khualzin tlawhtu an neih tam rin a ni. Mahse hripui leng vangin Summer Games hi ṭhulh a, hri darh tur venna atan Japan sorkar pawhin khuahkhirhna te siamin, hun rei tak ramri te a khar a ni. Hei vang hian nikum chhung khan khualzin lut tura an lo beisei lawk aṭanga 10% vel chauh an nei thei a ni. 

Khuahkhirhna khauh tak siam a nih avangin nikum May thlaa Japan rama ram dang khualzin lut chu a kum hmasa May thla aiin 99.9% in an tlem zawk a, hemi thla hian khualzin 1,663 chauh an lut a ni. Hri lengin ziaawm lam a pan chhoh hnuah sorkar pawhin khuahkhirhna a thlahdul ve ṭan a, December thla khan khualzin lut hi 58,700 an awm a, mahse kum 2019 December thla aiin khualzin lut hi 97.7% in an la tlahniam tho.