Boris Johnson-a'n Britain thar din a tiam
Britain-a rorellai, Conservative Party chuan December 12-a inthlanpui an neih tur atana an party manifesto chu Pathianni khan a tlangzarh.
Manifesto tlangzarhnaah Britain prime minister Boris Johnson chuan sorkarna an siam leh thei a nih chuan Britain thar din tura a intiam thu a sawi. Boris chuan "Kan party Conservative-in hnehna kan chang leh a nih chuan Brexit chungchang pawh tihfel a ni tawh ang. Brexit chungchang tihfel a nih chuan kan thinlung leh ngaihtuahnate pawh British mipuiteah chauh kan sawrbing thei tawh dawn a ni." a ti.
December 25 hmaa Parliament-a Brexit "Withdrawal Agreement Bill" putluh leh hman ngei chu Boris hian Britain mipuite hmaah a intiam bawk. Britain Parliament-a House of Commons chuan October thla khan a thuphungin Withdrawal Agreement Bill a lo pawm tawh a, mahse December-a inthlan a awm dawn avang hian Parliament-ah phar ṭhat leh a ngai a ni.
Phek 59-a chhah an manifesto-ah hian National Health Service (NHS) England-a kum 2024 hmaa nurse hna ruak 50,000 siam belh te, NHS visa kaltlanga ramdang aṭanga nurse 12,500 lak belh te, GP appointment maktaduai 50 chuang siam te, an rama pemluh tumte tana khuahkhirhna khauh zawk siam te, triple tax lock an tih - income tax, National Insurance leh VAT tihsan lohte chu an manifesto-ah hian a tel bawk.
Manifesto-a an tarlan dang Ṭhenkhat chu :
n School funding tihsan
n Police officer post ruak 20,000 chuang siam
n Childcare atana kumkhata pound maktaduai 250 dah
n Environment atana pound tluklehdingawn 6.3 dah
n Kut themthiamte tan 'National Skills Fund'-a kum 5 chhunga atana maktaduai 600 dah
n Leeds leh Manchester khaw inkara Northern Powerhouse Rail siamna tura pound tluklehdingawn 28.8 dah
n England leh Wales-a sihal, ui leh wild mammal dangte veh phal lohna 'Hunting Act' hman chhunzawm zel
n Sorkar, parliament leh court hnathawh dan leh inkungkaihnate ennawn