Philippines president-in ICAD hotu a ban

Philippines president Rodrigo Duterte chuan a vice president, Leni Robre­do chu an rama ruih­­hlo do beihpui a thlak meknaa hma la tu, Inter-Agency Committee on Anti-Illegal Drugs (ICAD) hotu a nihna aṭangin a ban. 

Kum 54 mi, Leni Robredo hi ICAD hotu atana ruat a nih aṭanga kar khat thum lekah ban leh nghal a ni a, President chuan ban a nihna chhan hrang hrang a sawi zingah sorkar thuruk vawng tura a rinngam tawk loh thute a sawi tel. 

Robredo hi President Duterte-a'n ruihhlo do beihpui a thlak dan chung­chang ualau taka sawisel fotu a ni. Beihpui thlaknaah ruihhlo ngawlvei leh ruihhlo zuar nia puh, mi tam tak tihhlum an ni tel chu a dem thute pawh a sawi a ni. ICAD hotu atana ruat a nih hnuah pawh, pawisawi lo nunna lak ṭhin tihtawp a nih theihna turin a thuneihna chu hman a tiam a ni. 

Kum 2016-a Phili­ppines president atan thlan tlin a nih hnu khan, Duterte chuan an ram chu ruihhlo hmunpuiah a chang tawh nia sawiin, ruihhlo do beihpui thlak a nih tur thu a puang nghal a ni. President chuan mipuite hnenah ruihhlo nghawlvei leh zuarte chu that tura ngenin, hetiang mi thattute hnenah lawm­man pe turin police-te pawh a ngen tur thu a sawi. 

Beihpui an thlak hnu hian ruihhlo zuar leh  ngawlvei nia puh, mi 6,600 vel zet thah an ni tawh niin police-te chuan an sawi. Mahse activist-te chuan thi zat hi 27,000 an tling tawh niin an sawi thung. Ram hrang hrang leh human rights group-te chuan Philippines sorkar hmalak dan hi an sawisel a, UN leh International Criminal Court pawhin an lo chhui chiang tawh bawk. He­tihlai hian Philippines mipuite chuan President Duterte leh ruihhlo do  beihpui a thlak hi an thlawp ṭha hle thung.