Iraq: Sorkar duh lohna lantirte security force-ten silaiin kap
Iraq-a sorkar duh lohna lantirtute lakah security force-te chuan silai hmet puakin mi panga an thi tawh.
Basra-a Gulf port city-ah Pathianni khan security force-te silai hmehpuahah hian mi pahnih an thi a, 50 vel an hliam bawk. Inrinni zan tlai tawh takah khan Nasiriya-ah mi pathum lo kaphlum tawh bawkin, hetah pawh hian mi 40 vel an hliam a ni.
Eiruk duh lohna, hna tam zawk phut leh public service ṭha zawk phut avanga nawrh huaihawtte hian October thla aṭang khan nawrh hi an huaihawt ṭan a, mi 300 vel zet chu hemi avang hian an thih tawh bakah mi sang chuang an hliam tawh bawk.
Iraq khawpui Baghdah leh an ram chhim lam hei hian a nghawng deuh ber a, Basra leh Nasiriya pawh hi Iraq chhim lama awm ve ve an ni. Inrinni khan Nasiriya-a nawrh huaihawtte hnawh darhna tur hian security force-te chuan tear gas an hman avangin damdawi-in aṭangin naupang eng emaw zat chu lakchhuah an ngai hial bawk. Pathianni khan nawrh hi huaihawt chhunzawmin sorkar building kawtah thil halin, lei an dang a, school-te pawh an khar bawk a ni. Nasiriya hi Baghdad aṭanga km 3000 vela hlaa awm a ni a, Iraq-ah chuan Pathianni hi hnathawh ṭan ni ni mah se nawrh huaihawtte hian school hawn an phal lo thung.
Basara khaw chhim lamah pawh nawrh huaihawtte hian lawng chawlh hmun Umm Qasr kawng dangin, khawpui thianghlima an ngaih Karbala-ah pawh nawrh huaihawtte leh police-te an innekbuai bawk a, hetah hian mi 35 vel an inhliam a ni.
Buaina chhuah chhoh dan
Kum khat liam taa prime minister Adel Abdul Mahdi-a'n a office a luah hnu lawk khan an ram kalphung siamṭhat a tiam a ni. Mahse hna nei lo tam lutuk te, eirukna tam leh public service chhe lutuk avangtein Iraq ṭhalaite lung a awi thei lo a, October 1 khan a ṭum khatna atan Baghdad-ah nawrh an huaihawt a, kawng an zawh.
He nawrh huaihawt hi ramchhung hmun hrang hranga miten thlawpin khawpui hrang hrangah nawrh hi chhunzawm a ni a, security force-te pawhin tharum hmangin nasa takin an bei let ve bawk. Nawrh huaihawt thawh khatna hian ni ruk chhung awhin tualchhung mi 149 an thi hman. Hemi hnu hian Prime Minister chuan a cabinet siksawi a tiam a, a official pawimawhte hlawh tihhniam tiam bawkin hna nei lo tam lutuk tihziaawmna scheme-te pawh a pharh bawk a ni.
Hetichung hian duh lohna lantirtute hi an la lungawi thei lo a, an beisei ang tihhlawhtlin a la ni lo tih sawiin, October thla tawp lam aṭang khan nawrh hi an huaihawt chhunzawm leh a ni.