Bangladesh-in Rohingya refugee camp hung dawn

Bangladesh sorkar chuan Cox Bazar district-a Myanmar aṭanga raltlan, Rohingya Muslim-te awmna camp chu barbed wire hmangin hung tumin hna thawh ṭan a nih thu an sawi. 

Refugee camp hung hi human rights group lam chuan an sawisel nasa hle thung. Bangladesh Army chief General Aziz Ahmed chuan theihtawp chhuaha hna an thawh thu sawiin, camp ṭhenkhatah chuan pillar te pawh siam fel a ni tawh tih a sawi. Hemi rual hian barbed wire leina tur chu sorkarah thehluh a nih tawh a, a tihfelna turin hun rei vak lo nghah a la ngai dawn tih a sawi. 

General Aziz chuan sorkarin Myanmar leh India ramri hrul, km 287-a thuiah kawngpui siamna tur pawh a dah thu a sawi  bawk. Sorkarin Rohingya refugee camp hung a tumna chhan hi an awmna tura ruatsak ni lo, ramchhung hmun danga an awmdarh tur venna atana a tih a ni. Home minister Asaduzzaman Khan chuan PM thupek angin, dan leh thupek kenkawh a awlsam zawk nan te, camp-a awmte himna tur atante barbed wire hmangin camp-te hi hung vek an ni dawn tih September thla khan a lo sawilang tawh a ni. 

Human Rights Watch chuan Bangladesh sorkar thil tum hi na takin a sawisel thung a, camp-a awm raltlante zalenna palzutsakna niin an puh. Thuchhuah an siamah, HRW chuan sorkar chuan camp-a awmte himna tur a ngaihsak a ngaih rualin, an zalenna chanvo neihte erawh palzut sak an ni tur a ni lo, a ti.