Palestinian-ten nawrh huaihawt tum
United States (US) sorkarin Israel-in Palestinian ram a luah, West Bank-a Israel mi awmte chu dan ang thlapa awmah a pawm thu a puan hnuah, Palestinian-te chuan US thutlukna siamah lungawi lohna lantirin nawrh huaihawt an tum.
Palestinian official-te chuan vawiin aṭang hian nawrh huaihawtin, 'Day of Rage' an hmang dawn tih an sawi a, West Bank-a military checkpoint hrang hrangah lungawi lohna lantir an tum. Ramallah-a National and Islamic faction coordinator, Issam baker chuan Pathianni khan civil society organisation hrang hrangte chu meeting an neihpui thu sawiin, US sorkar thupuan chu an hnawl tih a sawi.
Palestine Liberation Organization (PLO) secretary general Saeb Erekat chuan West Bank chungchanga US thusawi hi ICC general commission ah pawh thlen an tum tih a sawi. ICC judicial council hnenah Israel-in Palestinian ram a luahsak dan te, dan loa a ram luahsakna hmuna company awmte chungchang pawh chhuichiang tura an ngen tur thu a sawi a ni.
Kar liam ta khan US Secretary of State Mike Pompeo chuan West Bank chungchang chu Israel leh Palestinian-ten inbiakna hmanga an chinfel tur a nih thu a sawi a, hemi rual hian he hmuna Israel mi awmte chu international law kalhah US chuan a ngai lo tih a sawi. Israel chuan US thutlukna siam danah hian a lawm thu sawiin, Israel prime minister Benjamin Netanyahu chuan US in a ngaihdan a thlak tak hian thil dik lo a ti tidik ta niin a sawi hial a, ramdangte pawh US thutlukna ang siam ve tur hian a sawm nghal bawk.
Israel-in Palestinian ho ram a luahsak, West Bank leh East Jerusalem-ah hian Israel mi nuai 50 vel an khawsa mek a ni. Khawvel ram tam zawkin Israel thiltih dan hi international law kalh niin an puh a ni.