Israel PM Netanyahu A ban kher a ngai lo

Israel attorney general Avichai Ma­delblit chuan prime minister Benjamin Netanyahu chu eiruk thubuai siamsak ni mah se, PM a nihna aṭanga a ban kher a ngai lo tih a sawi. 

Benjamin Netan­yahu hi thamna la leh a thuneihna dik lo taka puhin thubuai siamsak a ni a, hei vang hian eptu pawl pawhin PM a nihna aṭanga bang turin an phut nasa hle. Hetihlai hian attorney general chuan bang kher loin, interim prime minister angin a la awm chhunzawm zel theih thu a sawi a ni. 

Israel danah chuan public official, cabinet minister-te pawh huam tel vekin, thubuai siamsak an nih chuan an hna chelh lai aṭanga bang tura tih an ni. Mahse he danah hian prime minister chungchang bik erawh sawilan tel a ni lo thung. 

Netanyahu hi Israel PM dinhmun chelh laia thubuai siamsak awmchhun a ni. Attorney general hian PM post hi a la chelh chhunzawm theih thu a sawi rualin, a ministry enkawl agriculture, labor and welfare, health leh Diaspora affairs-te chu a la enkawl chhunzawm zel thei dawn em tih erawh a sawichiang lo. 

Israel PM ni rei thei ber, Netanyahu chuan an puhna  hrang hrangte chu hnawlin, amah paihthlak an tumna hmanrua a ni tiin, ban a tum loh thu a lo sawi tawh a ni. PM office aṭang chuan an puhnate hi a bei let dawn tih a sawi. 

September thlaa inthlanpui an neih hnuah tun thlengin Israel-ah hian sorkar thar a la ding thei lo. Seat la hnem pahnih, Netanyahu party Likud Party leh Benny Gantz kaihhruai Blue and White Party-te chu ṭangrual sorkar siam tura an hmalaknaah an hlawhchham a ni. Parliament chuan member zinga pakhat chu sorkar siam tur hian a thlang leh thei ang. 

December 11 thlenga sorkar thar a din theih loh chuan thla 12 chhunga a ṭum thumna turin Israel hian inthlanpui a neih leh a ngai dawn a ni.