Manchester-ah Gandhi lim an hawng

England hmarthlang lama awm Manchester khuaah India hnampa, Mahatma Gandhi lim siam chu Thawhṭanni khan hawn a ni.

He lim siamtu hi khawvela lim sang ber, Gujarat-a 'Statue of Unity' pawh lo design tawh tu, India artist hriathlawh tak Ram V Sutar  a ni a, feet 9 a sang a nih bakah kg 800 a rit a ni. He lim siam hi United Kingdom Shrimad Rajchandra Mission (SRMD) Dharampur hnuaia 'Mahatma Gandhi Statue Project' zinga mi a ni. Gandhi thu kente chu khaw­vela hriat thar zel a nih theih nan Gandhi lim hi siam a ni.

"Manchester-a Gandhi lim hian politics leh democracy-ah thlirna ṭha zawk thlen ngei se kan duh a ni," tiin UK SRMD chuan thuchhuah an siam. Gandhi lim hi a piancham vawi 150-na hriatreng nana siam a ni a, Manchester Cathe­dral, Manchester City Council, Manchester India Partnership leh High Commission of India (London)-te chu he lim siam a nih theih nana hma latute an ni. 

"Muanna leh remna hmanga zalenna sual chhuak theitu, Mahatma Gandhi hi Manchester khuaah hian englai pawhin ka lo lawm reng a ni," tiin Manchester City Council hruaitu Richard Leese chuan a sawi. Manchester Airport CEO leh Manchester India Partnership chairman Andrew Cowan chuan Gandhi lim hi Greater Manchester leh India inpawhna lei dawh pawi­mawh tak a nih thu a sawi ve bawk.

Kum 1931 khan Eng­land hmarthlang lama awm Lancashire khuaa textile mills awm chu Gandhi hian a tlawh a, a zin ṭum hian mill-a hnathawkte hnenah India rama British bungrua lakluh khap a nih chungchangte a hrilh a ni. A zin chhung hian lawm a hlawh hle a, London aṭangin Blackburn leh Manchester khuate pawh a tlawh bawk.

University of Manches­ter Students' Union chuan thla hlui khan Gandhi lim siam chungchang an dodalna open letter chu Manchester City Council hnenah an thawn. Mahse buaina dang awm loin mi lim hawn inkhawm hi tluang taka neih a ni.