Bangladesh Islamist pasarih thi turin an chungthu rel

Kum 2016-a Bangladesh khawpui Dhaka-a cafe pakhata mi 22 thahnaa inhnamhnawiha puh, mi pariatte chungthu chu nimin khan ngaihtuah fel niin mi pasarih chu thi turin an chungthu relsak an ni. 

He tualthahna thubuaiah hian mi pariat man niin an chungthu rel a ni a, pakhat chu thiam chantir a ni thung. An mi mante hi pawi­khawihna thlentute ralthuam pek thubuai siamsak an ni a, nimin khan Dhaka-a anti-terrorism court chuan thi turin an chungthu hi a rel ta a ni.

Public prosecutor Golam Sarwar Khan chuan an puhna chu a dik a ni tih chiang taka an finfiah thu sawiin, court chuan hremna na thei ang bera hrem turin an chungthu a rel thu a sawi. Anti-Terrorism Special Tri­bunal judge Md Majibur Rahman chuan khaihlum turin an chungthu hi a rel.

Thiam loh changte hi: Hadisur Rahman, Rakibul Hasan Regan, Aslam Hossain Rash, Md Abdus Sabur Khan, Shariful Islam Kha­led, Mamunur Rashid Ripon leh Jahangir Hossain-te an ni a, Jamaat-ul-Mujahideen Bangladesh (JMB) firfiak pawl mi leh sa vek an nia sawia ni bawk. 

He pawikhawihna hi a thlen tirh khan  Islamic State (IS) firfiakte chuan an tih niin chhal mah se Bangladesh sorkar chuan a pawm lo thung a, tualchhung firfiakte chu mawhphurtuah a puh thung a ni.

July 1, 2016 khan Dhaka Gul­shan area-a Holey Artisan cafe-ah chuan chempui leh silai keng mi panga lutin, silai an hmetpuak vak a, cafe-a chawlte chu an hreng zui bawk. An silai hmeh puahah hian mi 22 an thi a, heng zingah 17 hi ramdang mi niin Italian leh Japanese an tam ber a, American leh Indian pawh an tel. 

Cafe-a lut misual te leh sipaite chu inep zuiin darkar 12 zet an inep hnuah army commando-te chuan building an luhchilh ta a, an mi hren 13-te chu chhanchhuakin misualte hi an kaphlum vek a ni. Bangladesh prime minister Sheikh Hasina phei chuan he pawikhawihna hi na taka a dem thu sawiin, "Eng ang Muslim nge an nih? Sakhua pawh an nei lo a ni hi," tiin a sawi zui hial.