2018-ah Greenhouse gas tihchhuah a sang ber

Kum 2018 kha boruaka Greenhouse gas tihchhuah san ber ṭum niin, kum 2017-a carbon dioxide (CO2) chu 405.5 parts per million (ppm) a nih laiin, nikum khan 407.8 parts per million-a a kai chhoh thu UN report chuan a tarlang.

Boruaka Greenhouse gas chhuak tihziaawmna atana hmalakna a awm loh chuan mihring tan a la hlauhawm theih dawn thu UN report chuan a tarlang bawk. Hemi atan hian kar lehah hian Spain khawpui Madrid-ah "Emissions Gap Report" tlangzarh tum a ni a, he hmalakna hi khawvel sik leh sa chungchanga report kimchang kan hriat theihnan leh, sik leh sa chungchanga hma kan lak thiam theihna tura tih a ni.

Paris Agreement, kum 2015-a ram hrang hrangten khawvel sik leh sa chungchanga an thawhhona tura an hmalaknaah khan boruak lum lam chu 1.5 degrees Celsius aia sang lo a thunun theih an remti tlang a ni. Heng hmalaknate hi tih­hlawhtlin a nih loh chuan tui­hnuaia khawsa 'coral reef' leh 'Arctic region'-a vurte chuan an tawrh tur thu UN report chuan a tarlang bawk.

Kum zabi 21-na hman lai mekah hian khawvel lum lam chu 3.2 degree celsius-a a kai chho theih thu U.N. Environment Programme (UNEP) chuan a tarlang. Ram hrang hrangten kum 2020-2030 chhunga emissions hi kumtina 7.6%-a kan tihhniam loh chuan, Paris Agreement-a boruak lum lam 1.5 degrees Celsius aia sang loa thunun theih tumna kha, tihhlawhtlin theih a nih dawn loh thu tarlan a ni.

Kum 2020-ah hian ram hrang hrangten, gas tihchhuah nasa taka tihziaawm a nih theih nana hmalakna an neih nasat a ngaih thu UN reoprt chuan a tarlang.