Japan power plant-a reactor hman phalsak

Kum 2011-a Japan hmar­chhak lam lirnghing na tak, magnitude 9 in a sawi avanga chhiatna nasa tak a thlen aṭanga kum riat hnuah, Tohoku Electric Power company chu Onagawa power plant-a a reactor No 2 hman phalsak a ni ve ta.

Kum riat liamtaa Japan rama lirnghing na tak inṭanna, epi­centre aṭanga nuclear station hnai ber chu Onagawa hi a ni. He lirnghingin tsunami na tak a thlen zuiah hian mi 20,000 dawn an thi a ni. He station pawh hi tsunami hian a nuai tel a, mahse cooling system-te erawh a chhe lo hlauh a, hei vang hian reactor pathumte pawh an him theih phah a ni. 

Lirnghing vang hian Japan rama reactor 54 te chu chawlh tir nghal an ni a, hengte hi Japan electric mamawh hmun thuma ṭhena hmun khat pechhuaktute an ni. Mahse sorkar chuan chhiatna thlenga nuclear station te an him theih zawkna turin dan thar a siam nghal a, hemi hmang hian licence pek thar leh tura tih a ni. Dan thar siam hnuah reactor pakhua chu hman phalsak an ni tawh.