Israel-in Gaza-a Hamas hmun kap

Israel Defence Forces (IDF) chuan nimin zing khan Gaza Strip-a Hamas ho hmun an kahsak. Hei hi Thawhlehni zana Palestinian-te hmun aṭanga rocket hmanga Israel chhim lam beih a nih avanga an chhan letna a nih thu IDF chuan a sawi. 

IDF chuan fighter jet-te hian Gaza Strip chhim lama Hamas te hmun eng emaw zat an kap fuh a, heng zingah hian ralthuam siamna hmunte pawh a tel niin a sawi. Gaza hmarlama underground infrastructure pawh an kahchhiatsak bawk. Hamas ho hmun bakah an thurualpui, Islamic Jihad ho hmun pawh an kap tel nia sawi a ni. Thi leh hliam erawh an awm lo. 

Thawhlehni zan khan Gaza Strip aṭang hian Israel lamah rocket pahnih kahchhuah a ni a, pakhat zawk chu Israel arial defence system chuan a lo kapthla a, mahse pakhat dang erawh chu  Sderot khuaa leilet hmunah a tla thung. Thil tihchiat liantham a nei lo. 

Israel prime minister Benjamin Netanyahu chuan Palestinian te chenna lam aṭanga Israel beihna tura rocket kahchhuahte chu na taka chhan let an ni nghal zel dawn tih a sawi a, hemi hnu lawk hian Israel sipaite chuan Hamas ho hmun hi an bei zui ta a ni.