Hong Kong nawrh huaihawtte thlawpna bill US President-in a pawm

US President Donald Trump chuan Hong Kong-a sorkar laka lungawi lohna lantira nawrh huaihawt mekte thlawpna, Human Rights and Democracy Act chu a pawm.  

President Trump chuan he bill hi China President Xi Jinping leh Hong Kong mipuite zah tak chungin a pawm sak a, law-a chantir turin a hming a sign hnan tih a sawi. China chuan he thil hi na takin a sawisel zui nghal a, China foreign ministry chuan US hian kawng dik lo a zawh chhunzawm zel a nih chuan a nghawng a la tuar ngei ang tiin a vau. 

China chuan US chuan thil dik tak a ngaihthah zawk niin a sawi a, thil dik lo tia tharum thawhna thleng a, thil tam tak tichhetute chu a thlawp a ni, a ti. China-a US ambassador pawh koin, China ramchhung inrel­bawlnaa US inrawlh tumna chu tihtawp tura sorkar nawr turin an phut bawk. 

Hong Kong sorkar pawh­in American bill chu sawiselin, hei hian boruak ṭha lo a thlen zawk dawn a, Hong Kong tualchhung buaina tawh mek pawh a tihziaawm phah dawn lo tih a sawi. Hetih lai hian Hong Kong-a nawrh huaihawtte chuan US law siam thar chu fakin, activist Joshua Wong chuan Hong Kong mipui tana chhinchhiahtlak a ni, a ti. 

Human Rights and De­mocracy Act hi Hong Kong-a nawrh huaihawt a nih ṭan, June thla khan House of Representatives-ah putluh a ni tawh a, October thla khan House chuan a pawm a ni. He bill-ah hian Hong Kong chu China  hnuaia awm ni mah se, legal leh economic system hran nei a ni tia tarlan a ni. Hong Kong Basi Law hi a humhalh, civil mite dikna chanvo leh dante chu China hian a palzut sak em tih  kumtina enfiah tura tih a ni bawk. Bill-ah hian Hong Kong-a nawrh huaihawt vanga man tawkte pawh, US chuan visa pek a remti tho tur a ni tia tarlan a ni bawk a ni. 

Kumin June thla aṭang khan Hong Kong-ah hian nawrh huaihawt ṭan a ni. Nawrh an ṭanna chhan, thiam loh chang tawhte an chungthu ngaihtuah tura mainland China-a thawn theihna tur, extradition bill siam tum chu sorkarin hnukdawk tawh mah se Hong Kong sorkar lakah lungawi lohna hrang hrang lantir chhunzawm zel a ni. 

Nawrh huaihawtte leh police-te pawh an intibuai fo a, tharum thawhna pawh a thleng fo tawh bawk. Police lam pawhin mipuite thunun tumin silaite pawh an hmetpuak a ni.