Kum 40 liam hnuah New Zealand-in ngaihdam dil

New Zealand prime minister Jacinda Adern chuan nimin khan kum 40 liam taa Antarctica-a thlawhtheihna chesual vanga mi 257 thihna thleng chungchanga khatihlaia New Zealand sorkar chetdanah khan ngaihdam a dil. 

Kum 1979, November 28 khan Air New Zealand fligth 901 chu Auck­land tlawh a kal chu, US Antarctic research base, McMurdo Station bula Mount Erebus tlang pang suin a chesual a ni. He thlawh­theihnaa chuang khualzin 237 leh thawktu 20-te chu an thi vek a ni. 

Thlawhtheihna chetsual chhan­ah hian a tirah chuan pilot-te chu puh an ni a, mahse a hnuah mipui lam  ngenna vangin chhui chiang turin Royal Commisison of Inquiry din a ni. Commission-in a chhui chian hnuah, chetsualna thlen chhan ber chu sorkar enkawl airline-in thlawhtheihnaa thawktute hrilh loa aircraft navigation system a lo siamṭhat vang nia sawi a ni. Mahse he report hi Air New Zealand leh sorkar chuan pawm loin, na takin an sawisel thung. 

Prime Minister Ardern chuan chetsualna thlen laia New Zealand sorkar leh airline te thiltih dan chuan vanduaina tawk chhungte natna an belhchhah tih sawiin, kum 40 liam tawh mah se an thiltih avang hian sorkar aiawhin he chetsualna thlenga an chhungte lo chantute hnenah  ngaihdam a dil tih a sawi. Chetsualna thlenna chhan chu pilot-te vang a ni lo tih a sawi nawn leh bawk.