Iran-a buaina chhuakah bank 700 chuang kang
Iran-a buaina chhuak avangin private bank 731 leh sorkar bank 140-te an kang chhia tih Interior Minister Abdolreza Rahmani Fazli chuan a sawi.
Petrol man tihsan a nih avanga lungawi loin, November 15 aṭangin sorkar laka lungawi lohna hi lantir a ni a, hmun hrang hrangah buaina a chhuak a ni. Nawrh huaihawtte buaina siamah hian bank 700 chuangte chu a kan thu tarlan a ni.
He buainaah hian security force-te awmhmun khuarna 50 chuang beih a nih bakah, gas station 70 bawr vel tih kan a ni bawk. London-based Amnesty International chuan Iran-a buaina chhuakah hian mi 143-in nunna an chan tawh thu a tarlang.
Center for Human Rights (Iran) pawhin buaina avang hian mi 4000 dawn man an ni tih a tarlang. Mahse Iran sorkar chuan Amnesty-in thi zat a tarlan hi a dik loh thu sawiin, thi zingah hian security force-te pawh an tel tih sawiin, mi 1000 bawr vel man an nih thu a sawi bawk.