Trump-a'n Afghanistan-a US sipaite a tlawh

United States president Donald Trump chuan puan zar lawk awm loin, Ningani khan a vawi khatnan Afganistan-ah zinin US sipai awmte a tlawh. Hei hi president a nih hnua Afghanistan a tlawhna  hmasa ber a ni. 

Afghanistan-a remna leh muanna a awm theihna atan Taliban firfiakte nena inbiakna neih a, inkahhai puan a nih theih nan hmalak zel a duh thu Trump chuan US sipaite a tlawhnaah a sawi. "Inkahhai puan hi US hian a duh a, anni lam hian a tira an duh loh hnuah tunah chuan an duh tawh a ni," tiin Trump chuan a sawi a ni. Kumin November thla tira Taliban-te'n American leh Australian an hrente an chhuahsak hnuah, US hian inkahhai puan a remna siam a hreh loh thu Afganistan lakah hian a tilang leh a ni. 

Air Force One thlawhtheihna hmangin, Afghanistan-a Bagram Airfield hmunah Ningani zanlai khan Trump hi a ṭum a ni. White House national security adviser Robert O'Brien leh Secret Service agents-ten Trump hi an zui bawk. US sipaite nena zanriah an eiho hmain, Trump chuan Afghanistan President Ashraf Ghani chu a hmu bawk. September thla khan Trump chuan kum 18 chhung Afghanistan-a firfiak nena indona tihtawp a nih theihna atana remna kawng zawnga Camp David hmuna inbiakna neih tur chu, US sipai pakhat thahnaah Taliban-te an inhnamhnawih ngei tih sawi a awm leh tak avangin a ṭhulh a ni. 

US leh Taliban-ten inremna siam tuma rawtna an siamah, kar 20 chhungin Afghanistan-a US sipai 5,400 lakchhuah rawt a ni. Hemi chhan let nan hian Taliban-te chuan Afghanistan-a firfiak zawnga chetna thlen tihtawp an tiam bawk. Kum 2001-a US-in al-Qaida firfiakte beipui an thlak aṭang khan Afghanistan-ah hian, US sipai 13,000 vel leh NATO sipai sang chuang an la awm mek a ni.