Samoa ramah sentût vangin 42 thi

Ramdangten medical staff leh damdawi thawn Samoa ramah sentût hri leng vangin mi 42 an thi tawh a, ram hrang hrangte Samoa ram pui tur hian medical staff leh damdawite an thawn lut tawh bawk. 

Hri leng vang hian tun thla tir lam khan Samoa sorkar chuan state of emergency a lo puang tawh a ni. Sorkar chuan sentut vanga thi tam zawk hi  naupang an nih thu a sawi. Nimin khan health ministry chuan sentut vei mi 3,149 hriatchhuah an ni tawh tih sawiin, an zinga mi 213 chu Ningani-a hmuhchuah a ni, a ti.

Samoa ṭhenawm, New Zea­land chuan sentut hri leng mek  khuahkhirh tuma hmalakna te, a veite enkawl hna thawh mekah pui turin medical staff leh damdawi eng emaw zat a thawn. Sentut hri danna, vaccine 100,000 leina tur sum a pe dawn bawk. 

United Kingdoms pawhin nimin khan Samoa pui tur hian doctor leh nurse rualte chu an kal tih a sawi a, Australia pawhin medical staff bakah damdawi a thawn bawk a ni.