Turkey Foreign Minister-in France President Terrorist sponsor-ah a puh

Turkey foreign minister Mevlut Cavusoglu chuan French president Emmanuel Macron chu terrorist pawl sponsor-ah puhin, Elysee-ah a mikhual ṭhin tih a sawi.

Mevlut Cavusoglu chuan Emmanuel Macron chu Europe ram hruaitu ni duhah a puh bawk. Kar hmasa khan Macron hian Turkey sorkar dotu Kurdish kaihhruai Syrian Democratic Forces (SDF) official-te chu a mikhual a, hei hian Turkey hi a tilungawi lo hle. Turkey chuan SDF-te hi firfiakah an puang a ni.

Macron erawh hi chuan SDF-te meeting a neihpui chhan hi Islamic State group-te beihnaa an thawhdunna chungchang leh Turkey-in Syria-a beihpui a thlak vang a nih thu a sawi thung. Karleh mai hian Nato summit UK-ah neih a ni dawn a, Nato member ram pahnihte hi summit neih dawn a ruaiah an inkar boruak a chhe chho hle.

Ningani khan Macron hian kar thum liam taa a thusawi tawh, Nato chu thluak thi tawh nia a sawi chu a la pawm reng tih a sawi leh bawk a, kawng hrang hrangah an thawk ho ṭha tawh lo hle tih sawiin an harh a ngai a ni, a ti. Syria hmar lama Turkey-in beihpui a thlaknaah Nato an inrawlh lo chu a dem tih a sawi a, Nato 'tluak thi tawh' nia a sawi chhan ber pawh hi hemi vang hi a ni.

President Macron hian Kurdish-te an thlawpna hnukdawka Syria aṭanga an sipaite an lakchhuah avangin vawi eng emaw zat US a dem thu a sawichhuak tawh a, Nato-a a thawhpuite berawn loa hetianga hma a la hi a dem tih a sawi bawk.