US-in Nato tana a sum pek titlem dawn Germany-in pek belh dawn thung
United States chuan NATO operating budget atana sum a thawh ṭhin chu tihtlem a tum a, hetihlai hian Germany chuan a sum thawh chu tihpun a tum ve thung.
NATO tana sum pek chungchangah European member te chu a lo sawisel fo a, an defence GDP aṭanga 2% pe tura an intiamna pawh hlen thei lohah a puh a ni. Hemi hnu hian alliance member 29-te chuan NATO tana sum pek dan hi siamṭhat an rel ta a ni.
NATO official chuan formula thar an siamah Europe ram tam zawk leh Canada ramte sum pek tur chu tihsan a ni a, US share erawh tihhniam a ni thung tih a sawi. Hei hi ram hrang hrangten rualkhai zawka sum an thawh theih dan tur ruahmanna a nih thu a sawi bawk.
Tuna formula hman meka member ramten NATO budget atana sum an pekah hian US chuan budget pum aṭangin 22.1% a pe a, hei hi US dollar tluklehdingawn 2.5 a tling. Germany hian 14.8% a pe thung. Mahse formula thar an siamah US hian budget pum aṭangin 16.35% a pe tawh dawn a, hetiang zat bawk hi Germany hian a pe ve tawh bawk ang. Member ram hrang hrangte ruahmanna thar siam hi an pawm laiin, France chuan a pawm ve lo thung.
France chuan he ruahmanna thar hi member dangte rawn loin US President Donald Trump leh Germany Chancellor Angela Merkel-ten an siam a ni tiin, a sum tum ṭhin 10.5% tihdanglam a tum ve lo tih a sawi.