Palestine-in US peace plan thlakna tur zawng

Palestine chuan Thawhṭanni khan thuchhuah siamin, US peace plan 'Deal of the Century' chu la hnawl zelin, Israel nena an buaina chinfel pui turin international community an ngen.

Palestine Liberation Organization (PLO) official chuan Palestine ram china Israel awmte an chhuah theih­na turin dikna leh rorelna dik beh­chhan international assembly din a rawt a ni. 

Thuchhuah an siamna PLO Exe­cutive Committee member Hanan Ashrawi chuan international assembly din chuan tuna peace plan awm mek chu thlakin remna atana hlauhawm thei thil chu a nuai bo thei dawn a ni, a ti.

Ramallah-a British parliament aiawhte nen meeting an neihnaah hemi chungchang hi sawi chhuakin assembly thar din a nih chuan dan loa Israel chet velna pawh chu tihtawp a ni thei dawn tih a sawi. 

Thuchhuah an siamah hian Palestine chuan an dinna chu an sawn dawn lo tih sawiin US peace plan hnawlna resolution United Nations Security Council-in an siam theihna turin UNSC chu an thawhpui dawn tih an tarlang bawk a ni.

PLO official tho Salleh Ra'fat pawhin 1967 hnu lama Israel-in an ram a luah chu an chhuahsan theihna tur international resolution siam turin international community chu interna­tional conference buatsaih turin a ngen ve bawk.

Palestinian Foreign Ministry chuan thuchhuah siam ve bawkin international community chuan US peace plan kalh zawngin hma an lak a tum tih an tarlang. US deal siam chu kalpui ṭan a ni tawh tih leh a bikin Jerusalem leh Palestina raltlante chungchangah chuan hma an la tawh tih an tarlang a ni.

January 28 khan US president Donald Trump chuan hun rei tak tihkhawtlaia awm tawh U.S. Mideast peace plan chu Israel prime minister Benjamin Netanyahu awm laiin Washington-ah a pharh a, hei hi Palestine chuan nasa takin a dodal nghal a ni.