Amazon CEO-in climate change dona turin $tld 10 pe dawn

Amazon CEO Jeff Bezos chuan climate change-in harsatna hrang hranga thlen do letna turin dollar tluklehdingawn 10 a pe dawn tih Thawhṭanni khan a sawi.

Bezos chuan Bezos Earth Fund a din dawn tih sawiin, heihi kan chenna khawvel chhe zel tur venna kawnga thawktu scientist, activist leh non-government organization-te a thlawp dawn a ni, a ti.

"Climate change hi kan khawvel tana thil hnawksak ber a ni," tia sawiin nipui aṭangin ṭanpuina pawisa hi a pe chhuak ṭan dawn tih a sawi bawk a ni.

Bezos-a intiam kamna hi ṭanpuina leh chhawm­dawlna chungchanga intiam kamna tam tham ber zinga mi a ni hial. Amazon hian nikum September-ah pawh khan 2040-ah chuan zero carbon emission an nih theihna tura ruahmanna an siam thu an lo sawi tawh bawk.