Saudi crown prince-in Iran khap Ṭul a ti

Saudi crown prince Mohammed bin Salman chuan Iran chu khaptu an awm a nih loh chuan khawvel-a oil man chu nasa takin a sang thei dawn tih a sawi.

Mohammed bin Salman chuan hmalakna a awm lo a nih chuan Iran chu a huangtau telh telh ang a, indona a chhuak thei mai dawn a ni, a ti. Chutiang a nih chuan khawvel economy-in nasa takin a tuar dawn niin a sawi bawk.

Salman hian an oil facility pahnih beihnaah chuan Iran chu mawhphurtuah a puh ve bawk a, mahse Iran chuan Saudi crown prince thusawi chuan zahna bak engmah a thlen lo ang, tiin a chhanglet ve thung.

Saudi lal la ni mai tur chuan khawvelin Iran lakah hma a la lo a nih chuan khawvel chuan harsatna nasa zawk a tawk dawn a ni tia sawiin, oil supply chu nasa takin a buai dawn bakah nasa takin a man chu a sang chho dawrh dawn a ni, a ti bawk. 

Middle East region chuan khawvel energy supply 30% zet an tum phak tih leh, global trade passage 20% leh khawvel pum GDP 4% chu an tum phak tih a sawi. "Heng zawng zawng hi a tawp tur angin han ngaihtuah chhin teh u. Chumi awmzia chu khawvel economy a tluchhe dawn tihna  a ni a, Saudi Arabia emaw Middle east rate chauh emaw ni loin khawvel pum a nghawng dawn a ni," a ti.

Iran chu dem chhunzawm leh bawkin an chetdan chu a atthlak hle tih a sawi. 

Mohammed bin Salman hi Pathianni khan CBS News chuan a interview a, hetah hian Iran chung chang a sawichhuah bakah Saudi journalist Jamal Khashoggi thah a nih chungchang a sawi bawk. He interview-naah hian Salman hi Jamal Khashoggi that turin thu a pe em tih zawhna an zawt a ni.

Saudi crown prince chuan that tura thupe nia an puhna chu pha in, a hunlai khan engmah a hriat loh thu a sawi. Mahse Khashoggi thihnaah chuan Saudi Arabia ram hruaitu a nihna angin mawh a phur tih sawiin, a bik takin a thattu chu Saudi sorkar hnuaia hnathawk a nih avangin mawhphurtu nia a inhriat thu a sawi a ni.

Khashoggi hi nikum October 2 khan Turkey-a Saudi Arabia con­sulate-ah thah a ni a, a ruang pawh hmuh tur a awm zui lo a ni.