US President Donald Trump chhui chiang President aṭangin paihthlak a ni thei ang em?

United States president, Republican Donald Trump chu President a nihna aṭanga paihthlak a nih theih dan tur kawng zawngin, House of Representatives chuan a chhui chiang mek. Hetihlai hian President aṭangin an paihthla thei meuh dawn em tih erawh a chiang lo. 

US President paihthlakna tur kalpui tur hian fiah a ngaihna chhan, an puhna chungchangah House of Representative-ah simple majority hmanga resolution pass a ni phawt. Hemi hnu hian President an puhna hi constitutional body-in a chhui chiang leh a ni.  

Mahse impeachment kalpui a nih avang ngawtin president Trump hi paihthlak a ni dawn tihna erawh a ni lo. America president hlui pahnih, Bill Clinton leh Andrew Johnson-te pawh khan fiahna hi an lo hmachhawn tawh a, mahse fiahna hi an paltlang ve ve a ni. 

House of Representative-a majority neitu, Democrats hian member 435-ah member 235 a nei a, impeachment process hi a kalpui a ni. House Speaker Nancy Pelosi chuan kar kal ta khan Republican member, president Trump  chhui chianna chu kalpui ṭan a nih thu a sawi a, mahse hi Trump chuan thil awmze nei lo, amah mimala an beihna niin a puh thung. 

Trump chhui chian a nih chhan 

President Trump paihthlak dan kawng zawnga chhui chianna neih a nihna chhan hi, July 25-a Ukraine president thar Volodymyr Zelensky nena telephone-a an inbiakna avanga rawn chhuak a ni. A hming puanzar loh, whistleblower pakhat (CIA nia sawi) chuan Donald Trump hian nakkuma US President thlanna neih turah, Ukraine president hi amah pui tura sawmin, a vau pah niin a sawi. 

Complaint thehluhah chuan, Trump hian a dinhmun siamṭhat nan, President thlanna neih tura Democrats lam presidential candidate beiseiawm ber, Joe Biden leh a fapa Hunter-te chu eiruk chungchanga chhui chiang turin Ukraine President hi a ngen nia sawi a ni. A puih loh chuan US-in Ukraine sipaite chhawmdawlna sum tam tham a pek ṭhin chu hrensakah a vau nia sawi a ni bawk. 

Hunter Biden hi Ukraine lamah sumdawnna nei a ni a, Biden chhungkua hi US pawn lam pawh ni se, eiruk thubuai siamsak an nih chuan, US voter tam takte rilruah an tla na dawn lo a, hei hian inthlan­ah nghawng lian tak a nei dawn a ni. 

Democrats lam chuan whistleblower complaint thehluh behchhan hian, Donald Trump chhui chianna tur hi a kalpui ta a ni. 

United States constitution chuan, president chu ram phatsan, thamna la leh pawikhawihna leh thil dik lo lian tak tihnaah thiam loh chantir a nih chuan, president a nihna aṭangin paih theih a ni, a ti. House of Representative-ah member tu pawhin president an puhna chungchanga chhuichianna tur resolution hi an pu lut thei a, hei hi sawihoa pass a nih hnuah, president chu chhui chian niin, Senate-ah a chungthu hi ngaihtuah zui a ni ang. 

President Trump an puhna hi trial stage a thlen chuan, Supreme Court chief justice kaihhruaina hnuaiah a chungthu hi ngaihtuah a ni dawn a, Senator-te chu jury member an ni ang. Donald Trump pawh Senate-ah lawyer a neih phalsak a ni dawn bawk a ni. 

Trial tawp hnuah, Senate-ah vote lak a ni ang. Senate member hmun thuma ṭhena hmun hnihin, Trump hi thiam loh an chantir a nih chuan US president a nihna aṭangin paihthlak a ni dawn a ni. Paihthlak a nih chuan a term la awmte hmang zo turin vice president chu president-ah dah chhoh nghal a ni bawk ang. 

Donald Trump chhuichianna hian trial stage pawh a thlen chhoh a rinawm lutuk lo. Thleng pawh ni se Senate hi Republican Party chakna niin, member 100 awmnaah 53 an nei pha a, hei vang hian Senate hian thiam loh a chantir a rinawm lo.

US President ni tawh zingah fiahna paltlang thei loa paihthlak an la awm lo. Watergate scandal avangin Richard Nixon kha chhui chian a ni bawk a, mahse President aṭanga paihthlak theih mai dinhmun derthawnga a awm tak avangin, impeachment stage an thlen hnuah amah zawk a bang ta a ni.