Coronavirus vanga thite ruang halral turin ti Ram dangte'n China kalpawhna khar belh zel
China rama novel coronavirus (nCoV-2019) leng chuan ziaawm lam a la pan thei lo a, he hri leng vanga thi hi nimin thleng khan mi 304 an tling tawh a, hri kai zat finfiah tawh hi mi 14,380 an tling tawh bawk. China ram bakah, Philippines ramah he hri vanga thi hi pakhat a awm tawh bawk a ni.
Hri leng vanga thi zinga mi 294 hi hri hmuhchhuahna, Hubei province ami an ni. Inrinni khan he province-ah hian mi 45 in coronavirus hi an thihpui. Philippines-a virus vanga thi pawh hi tunhnaia Hubei province khawpui, Wuhan aṭanga kal a ni.
China thuneitute chuan hri ṭai darhna, Wuhan City-a hri leng vanga thite chu vuina hun buatsaih lo a, a rang thei anga an ruangte halral zel turin a hriattir.
Inrinni khan China National Health Commission (NHC) chuan hriattirna tichhuakin, novel coronavirus vanga thite ruang chu an hnaih ber facility-ah a rang thei ang bera halral a, vuina hun hran buatsaih lo turin a ti a ni.
Novel coronavirus leng vangin ram eng emaw zatin China nena inkalpawhna an khar belh zel. China ram pawn lamah he hri vei hmuhchhuah tawh hi 100 vel an tling tawh bawk. US leh Australia chuan China rama zin hnaivai, ramdang mite chu an rama luh an khap dawn tih an sawi. Hemi hma hian New Zealand, Russia, Japan, Pakistan leh Italy chuan China aṭanga luh tumte an dan tur thu an lo sawi tawh bawk. Nimin khan South Korea pawhin tunhnaia Hubei tlawhtute chu an rama luh a khap dawn tih a sawi.
Hetih lai hian Word Health Organization (WHO) chuan China lama an ramrite khar lo turin ram hrang hrangte a ngen. Hei hian chanchin inhrilh kawngah te, medical suppy lamah leh economy thlengin nghawng ṭha lo a thlen thei tih sawiin, border-ah screening lam uluk taka kalpui zawk turin a ngen.