China-in National Day vawi 70-na lawm

China chuan nimin  khan Peo­ple's Republic of China (PRC) din champha vawi 70 an lawm a, Bei­jing-a Tianamen Square-ah military parade ropui tak buatsaih a ni. 

Civil war-a communist lamin hnehna an chan hnu, kum 1949 October 1 khan Mao Zedong, Chair­man Mao tia sawi bawk chuan PRC din a nih thu hi a puang a ni. Beijing-a National Day lawmna puala military parade-ah hian sipai 15,000 zet telin, sipai hmanrua 580 leh aircraft 160 an pholang. Military technology thar ber - military tank, helicopter leh DF-41 intercontinental ballistic missile-te pawh pholan zingah an tel. Parade-ah hian a ṭum khatna atan China-a UN peacekeeping force unit pawh an tel. 

Parade neihlai hian balloon 70,000 leh parva 70,000 chu square aṭangin chhuah an ni. China-in hnam hrang hrang a pawm 56-te pualin silai vawi 56 kah a ni bawk. Military parade zawh hnu hian civil miten show an nei zui ve leh a, mi nuai khat vel zet an tel a ni. Tlai lamah square-ah vek hian intihhlimna hun ropui tak buatsaih a ni bawk. 

China President Xi Jinping chuan Tiananmen Square-a National Day lawmna hmunah thu sawiin, eng thil mahin an ram leh an ram mipuite hmasawnna chu an dal dawn lo tih a sawi. Eng sipai mahin an ram lungphum chu an tinghing dawn lo tiin, hma lam pana an kalnaah inpum­khatna leh Hong Kong leh Macao-ah 'one country, two systems' an hman chu an vawng zel dawn tih a sawi. 

Hetih lai hian Hong Kong lamah chuan China duh lohna lantir a ni thung a, hmun ṭhenkhatah chuan tharum thawhnate a chhuak hial. Police-te chuan nawrh huaihawtte hnawhdarh nan hian tear gas-te an hmang a ni. Nawrh huaihawt vang hian metro station 15 leh khawpui chhunga shopping centre eng emaw zat khar an ni.