Pakistan Prime Minister-in Lirnghinna hmun a tlawh

Pakistan prime minister Imran Khan chuan Thawhṭanni khan, kar kal taa magnitude 5.8-a naa lir a nghinna hmun, Pakistan-occupied Kashmir (PoK)-ah kalin, lirnghingin thil a tihchhiatna hmunte a tlawh.

PoK-ah hian lirnghing vang hian mi 40-in nunna an chan a, mi 450 chuangin hliam an tuar. PoK huamchhunga Mirpur district chu a tuar na ber an ni. Lirnghing inṭanna hi Jhelum district hmar lam km 5 a hla leh km 10 a thuk a ni a, Pakistan khawpui Islamabad aṭanga km 119 vela hla a ni.

He chhiatna thlen lai hian PM Khan hi US-a United Nations General Assembly vawi 74-na hmanga a zinlai a ni a, an ram lama kir vat a, chhiat tawkte ṭanpui thuai a chak thu US-a a chamlai hian a sawi. Khan hian chhiatna thleng chungchangah hian PoK leader Raja Farooq Haider chu meeting puiin, Haider chuan ṭanpui hna an kalpui dan leh chhiat tawkte chhawmdawlna hna an thawh meka an hmalaknate a lo hrilh a ni.

He meeting-ah hian National Disaster Management Authority Chairman Lt Gen Mohammad Afzal leh Foreign Minister Shah Mahmood Qureshi-te pawh an tel. PM chuan lirnghingin chhiatna a thlen avanga thi chhungte hnenah sorkarin Rs.5,00,000 ṭheuh a pek tur thu a puang nghal a, divisional headquarters damdawi-ina hliam tuar an dahte chu a tlawh nghal bawk a ni.