Nawrh huaihawtna karah Indonesia legislator-te lalut

Indonesia Parliament member mi 575-te chu nimin khan rinawmna thu tiamtira lakluh an ni. Hetih lai hian Indonesia khawpui Jakarta-ah chuan dan siam thar leh siam thar tum eng emaw zat duh lohna lantirin nawrh an huaihawt. 

Nawrh huaihawtna karah poli­tical party pakua aṭanga legislator 575 lakluh inkhawm hi buatsaih a ni. 

Nawrh huaihawtte hi University zirlai 1000 chuang an ni a, Thawh­tanni aṭang khan an ram Parliament-in dan thar a siam duh lohna lantirin, an khawpui Jakarta-a Parliament kawtah nawrh hi an huaihawt a ni. Thawhṭanni kha Parliament member nilai 560-te session tawp ni a ni a, hetah hian zirlaite chuan dan thar an pass chu duh lohna an lantir a, an duh loh chhan ber pakhat chu 'anti-corruption agency' thuneihna tihniam zawnga dan thar an pass vang a ni. 

Heng bakah hian an ram constitution-a criminal code article an thlak an duh loh thu an sawi. He an thil thlakah hian inneih hmaa sex hman chu dan bawhchhiatna a nih tawh thu tarlan a ni bawk. Parliament-a luh tum zirlaite chu police-te chuan tear gas leh tui hmanga hnawh darh tumin an bei a, zirlaite hian police-te hi lungin an lo tawng ve thung a ni. Makassar leh Sulawesi province-ahte pawh kar kal ta Zirtawpni khan nawrh huaihawt a ni a, Sulawe­si khuaa Kendari-ah hian mi pathum an thi an, an zingah hian zirlai pahnih an tel bawk. 

President Joko Widodo chenna khua Central Java a buaina chhuak­ah pawh, police officer pali­in hliam an tuar. Indonesia khawpui Jakarta-a Parliament buildingah hian nimin khan venhim hna khauh tak kalpui a ni a, sipai leh police 24,000 ven tir an ni. Parliament panna kawngpui ṭhenkhatte chu kal tlang theih loha dan an ni bawk.