Afghan president thlannaah Abdullah chakah inpuang

Afghanistan sorkar Chief Executive leh presidential candidate Abdullah Abdullah chuan Thawhṭanni khan Inrinnia an neih zawh tak president thlannaah khan a chak dawn tih a sawi.

An party tana vote tla chu midang zawng aiin a tam tih sawiin, an chak ngei dawn tih a sawi. Hetihlai hian an ram Independent Election Commission (IEC) chuan November 7-ah result chu an puang chauh dawn tih a sawi thung.

Abdullah chuan vote thlaktute zawng zawng chungah lawmthu sawi bawkin, security force-te pawh Taliban vauna kara an hna ṭha taka an thawh avangin a fak hle bawk.

IEC-in a tarlan dan chuan mi maktaduai 2.2 velin vote hi an thlak tih sawiin, polling centre 3,736-ah vote hi thlak a ni tih an sawi a ni. Afghanistan-ah hian vote thlak thei mi maktaduai 9.4 vel an awm a, mi eng emaw zat chu inthlan dawn khan election worker-ten voter list-a an hming an hmuh zawh loh avangin vote thlak an phal lo bawk.

Abdullah hian an chak dawn niin sawi mah se Election official lam chuan thuchiang engmah hriat a la ni lo tih sawi thungin, vote chhiar hunah chiah result chu a chiang dawn tih an sawi. Inthlan result hi November 7 hian puan a ni dawn a, candidate 18 inziaklut awm zingah vote tla aṭanga 50% hmu phak an awm loh chuan vote hmu tam pahnih aṭangin President tur thlanna an nei ṭha leh dawn a ni.