Peru vice-president a bâng

Peru vice-president Mercedes Aráoz chuan Thawhlehni khan a ban thu a sawi.

Mercedes Aráoz chuan Thawhṭannia opposition legislator hruaitu lailawk atana ruat a nihna pawh chu a hnawl thu sawiin, hei hian an ram inthlanpui neih turah kawng ṭha zawk a hawn a beisei thu a sawi bawk. Aráoz chuan 'constitutional order' tihchhiat a nih thu sawi bawkin, an ram chuan harsatna nasa tak a tawk chho mek tih a sawi a ni.

Peru president Martín Vizcarra chuan Thawhṭanni khan Congress a ṭhiat a, mahse hei hi eptu MP-te chuan pawm loin, Aráoz hi an hruaitu tur hian an ruat zui bawk. Thawhlehni khan Congress-a eptu MP-te lut tur chu police-ten an lo dang zui a ni. Hetihlai hian Peru khawpui Lima-a congressional building chhunga awm MP 20-te chu president Vizcarra'n Congress a ṭhiah duh lohna lantir nan an chhuak duh lo.

Hemi hnu Thawhlehni zan rei tawh takah khan Mercedes Aráoz chuan a Twitter-ah a ban thu leh a rang thei ang bera inthlanpui buatsaih a ṭul thu sawiin, chu chu an ram tana ṭha tur pawh a nih thu a sawi.