Egypt-in New York atangin rangkachak kuang la let

Ptolemaic dynasty hunlaia mi, rangkachaka luan Egypt puithiam Nedjemankh kuang chu nimin khan, "Metropolitan Museum of Art" New York aṭangin "National Museum of Egyptian Civilization (NMEC)"-ah dah luh a ni.

Egyptian Antiquities Minister Khaled al-Anany chuan nimin khan Nedjemankh kuang hi rukbo a ni tih hriatchian a nih hnuin, New York aṭangin Egypt museum-ah dahlet a nih thu press conference a neihnaah a sawi bawk.

Kum 2017 khan Paris art dealer hnen aṭang dollar $mtd 4 a lei a nih hnuah "Metropolitan Museum of Art" New York-ah pholan a ni. Mahse he kuang hi Egypt aṭanga rukbo a ni tih hriat a nih hnuah MeT chuan a dahbo nghal a, Egypt hnenah pawh ngaihdam a dil zui nghal bawk a ni. 

Nedjemankh kuang hi "1971 Egyptian export license" lem hmangin, ramri kana sumdawn nana tawlhruk a nih thu Anany chuan a sawi bawk. Egypt Antiquities Repa­triation Depart­ment supervisor general Shaaban Abdel Gawad chuan he kuang hi Egypt aṭangin kum 2011 khan dik lo taka sumdawnnaa hmangin rukbo a nih thu a sawi.

Kuang rukbo hi Manhattan District Attorney's Office chuan chhui hna thla 20 chhung an thawk a, Egypt chuan a kawltu evidence an neih hnuah Attorney's Office-ah thehlutin an la let leh thei ta a ni. Kum 2016-a Egypt leh U.S-in Egyptian Antiquities zul zuia inremna an siam hmanga laklet leh a ni.