Baghdad-a bomb tipuaktuah IS firfiak pawl inchhal

Islamic State (IS) firfiak pawl chuan Ningani-a Iraq khawpui, Baghdad-a thihchilh bomb ṭum hnih tihpuah chu an pawl tih a ni thu an sawi. Bomb puakah hian mi 32 an thi a, mi 100 chuangin hliam an tuar. 

Thihchilh bomb hi Tayaran Square-a mipui lunna hmunah tihpuah a ni a, thil awmdan enfiah mipui an tlankhawm laiin a hnu reilote bomb pahnihna hi a puak leh a ni. He pawikhawihna thleng hi kum 2018 January thla hnua Baghdad-a hmun khata thihchilh bomb ṭum hnih tihpuah lehna hmasa ber a ni. Bomb puahna hmun hi second-hand thawmhnaw zawrhna hmun a ni. 

Pawikhawihna a thlen hnu, Ningani zanlai khan IS firfiak pawl chuan an pawl tih a nih thu hi an puang a ni. President Barham Saleh leh political leader hrang hrangte chuan Ningania an rama pawikhawihna thleng hi an dem thu sawiin, an ram muanna tichhe zawnga chete chu sorkarin na takin a chhang let zel dawn tih an sawi. March thlaa Iraq tlawh tumtu, Catholic kohhran hotu Pope Francis pawhin Baghdad khawpuia thil thleng chu a dem thu a sawi. US, UN leh European Union-te pawhin pawikhawihna thleng hi an dem thu sawiin, Iraq sorkarin firfiakte a do letna kawngah theihtawpa an puih zel tur thu an sawi. 

IS firfiakte hian kum 2014 khan Iraq ram hmun thuma ṭhena hmun khat chu an thunun hman a, Baghdah khawpui pawh an hnaih hman hle. Mahse sipaite nen kum thum chhung na takin an inbei zui a, kum 2017 khan sipaite chuan IS firfiakte hi an hneh a ni. Hemi hnu hian khawpui chhunga pawikhawihna pawh a thleng khat chho ṭan a ni. Baghdad khawpuia bang an siam leh checkpoint an siamte pawh an ṭhiat tawh a ni. Mahse firfiakte hi thlaler leh tlang lamah an la inkhuar chhunzawm reng a, security force leh infrastruture lam an bei ṭhin a ni. 

Firfiakte dona kawnga Iraq sipaite puitu, US sipaite chu a tam zawk lakchhuah an ni tawh a, tunah hian US sipai hi 2,500 vel an la awm. Anni hian Iraq sipaite chu training pein, surveillance leh airstrike an neihnaah te an la pui ṭhin.