Trump-a'n paihthlak tuma an chhuina chhang let
United States (US) president Donald Trump chuan president aṭanga paihthlak tuma Democrats lamin an chhui chian mekna chu chhang letin, intihderna mai mai a ni, a ti.
Whistleblower pakhat chuan president Trump hian July 25-a Ukraine president Volodymyr Zelenksy a biaknaah, 2020 US president thlanna neih tura Democrats president candidate tura beiseiawm ber, Joe Biden chu chhui chiang turin a nawr niin a sawi. A ngenna anga an tih loh chuan Ukraine sipaite tana US-in chhawmdawlna a pek pawh hrek sakah a vau tih a sawi bawk.
He complaint thehluh behchhan hian, House Speaker Nancy Pelosi chuan September 24 khan president Trump chungchang hi chhui chian a nih tur thu a puang a ni. Pelosi leh House Intelligence Committee chairman Adam Schiff chuan Trump chhui chian hna kalpui mai loh chu thlan tur dang an nei lo tih an sawi.
Hetih lai hian president Trump chuan an chungchang chhui a nih dan chu America mipuite laka pawikhawihna a ni tiin, Ukraine President nen chuan inbiakna hun ṭha tak an neih thu leh, a ṭul a nih chuan Schiff leh Pelosi mai ni lo, midangte pawh an inkawm dan chungchang hrilh a, a thawhpui theih vek thu a sawi a ni.
Sept. 25-a White House-in Trump leh Zelenskhy-te inbiakna chungchang a tarlanah, Trump hian Ukraine President hnenah hian Ukraine gas company chhuina kawngah a personal attorney Rudy Giuliani leh Attorney General William Barr-te chu ṭha taka lo thawhpui turin a ngen. He gas company hi US vice president hlui Joe Biden leh a fapa, Hunter Biden nena inzawmna nei nia sawi a ni a, hei vang hian Democrats lam chuan an helh hle a, chhui chian an tum ta a ni.