Iraq PM thar atan Mohammed Tawfiq Allawi ruat

Iraq president Barham Salih chuan kar liam ta Inrinni khan an ram prime minister atan communication minister hlui, kum 65 mi Mohammed Tawfiq Allawi chu a ruat.

PM thar atan Allawi ruat a nih chhan hi nikum December 1-a Adel Abdul Mahdi PM aṭanga a ban vang a ni a, a ban chhan hi an rama nawrh huaihawtten lungawi lohna nasa tak an lantir vang a ni. PM bangta Adel Abdul Mahdi hian a ban hnuah pawh a aiawhtu ruat a nih mai loh avangin Iraq caretaker PM hna hi thla hnih chhung a chelh zui a ni. 

Nikum October 1 aṭang khan Iraq khawpui Baghdad leh Iraq chhim lamah nawrh huaihawtna neih ṭan a ni a, an rama electric leh tui mumal loh avang leh economy-a tlakchhiatna an tawh vangin nawrh hi huaihawt a ni a, eirukna a hluar vangte pawh a ni bawk. Hna leh vangtlang tana hamṭhatna ngaihtuah sak turin sorkar an phut a ni.   

Vawi tam nawrh huaihawt a nih avangin nawrh huaihawtte leh security force-te inkarah buaina a chhuak fo a, mi 400 chuangin nunna an chan tawh a ni. School leh university-a zirlaiten nawrh huaihawt hi an ṭawiawm ṭha hle.