Hong Kong-ah Hmai tuamna hman khap

Hong Kong Chief  Executive Carrie Lam chuan nimin khan hmai tuamna hman khap a nih thu a puang a, nizan zan lai aṭangin he khapna dan hi hman ṭan a ni.

Hmai tuamna hman khap a nih chhan hi nawrh huaihawtte chu tute nge an nih tih hriat theihna tura tih a ni. Nawrh huaihawtte tharum thawhna avangin Hong Kong chu a chhe mek a ni, tiin Carrie Lam chuan a sawi. Hong Kong-a buaina hi nasa taka a punlun zel chuan nawrh huaihawtte do let hna hi  sorkar chuan a thawk tak tak dawn a ni, tiin Carrie Lam chuan a sawi bawk.

Nimin aṭang khan Lam chuan an ramah hian emergency a puang a, nawrh huaihawtte hian hmai tuamna khap a nih avang hian hmai tuam chungin kawngah Lam-i thutluk­na duh lohna an lan tir ve thung. Nawrh huaihawtte hian Hong Kong chu mipui zalenna ram leh democracy ram ni ve turin an phut thu sawiin, sorkar an au el zui bawk. 

Hong Kong khawpui hi mahni inrelbawlna hran nei ni mah se, kawng tam takah China thu neihna hnuaiah a la awm a, hemi duh lohna hi nawrh huaihawtte hian an lantir bawk. Police-te chuan nawrh huaihawtte hi tear gas, rubber bullet leh tui hmanga hnawhdarh tumin an bei let a ni. Nawrh huaihawtte hian hmai tuamna, helmet, tarmit leh boruak rimchhe danna hmai tuamna hmang chungin police te hi an tawng let ve bawk a ni.

Lam hmalakna hi Demosisto party secretary general Joshua Wong chuan duh loin, hei hi Hong Kong sorkarin a mipuite a rahbehna inṭanna tilangtu a ni, a ti.