Ecuador-in state of emergency puang

Tuialhthei man sang zel vanga ram puma veivahna kawnga harsatna nasa tak thleng duh lohna lantir a nih hnuah, Ecuador sorkar chuan nimin khan state of emergency a puang.

Ecuador president Lenin Moreno chuan ramchhung mite himna tur atan leh buaina lian zawk a chhuah lohna tur atan state of emergency chu an puang tih a sawi. Lenin Moreno hian kum 40 an lo kalpui tawh tuialhthei mana subsidy ramchhung mipuiten an neih ṭhin chu kalpui chhunzawm theih a ni tawh lo tih a sawi a, hei hian mi tam tak lungawi lohna thlenin duh lohna nasa takin an lantir a ni.

Mipuite hnena subisidy-a tuialhthei  pek vang hian Ecuador sorkar chuan kumtin $tld 1.3 a chawi a ngai a ni. Tuna an subsidy hmuh ṭhin tihtawp sak an nih takah hian diesel leh petrol man chu a leta a pun rin a ni bawk. Nawrh huaihawttute hi tran­sport sector bakah zirlaite an ni tlangpui a, Ningani khan rampum huap nawrh an huaihawt a ni.

Ecuador ram khawpui Quito leh Guayaquil khawpuiahte chuan taxi, bus leh truck driver-te chuan kawngpui leh leite an dang. Duh lohna lantirtu ṭhenkhat chu police-te nen innek buaiin police-te hian tear gas an hmante pawh a ngai hial.

Interior minister Maria Paula Romo chuan buaina chhuak kaih­hnawihah hian mi 19 an man tawh tih a sawi. Fuel subsidy hi 1970 vel aṭanga kalpui ṭan tawh kha a ni a, Mareno hian an ram economy ṭhatna tur leh ba an ngah lutuk tihziaawmna turin subsidy hi tihtawp a ni dawn tih a sawi. Thawhlehni khan Ecuador hian Organization of the Petroleum Exporting Countries (Opec) a chhuahsan thu a lo sawi tawh bawk.